ILOILO – Welcome development para kay Gov. Arthur Defensor Jr. ang pagkalakip sang probinsya sang Iloilo sa Low Risk Areas kun Coronavirus Disease 2019 (COVID-19) ang pagahambalan.
Sa interview sang Bombo Radyo kay Defensor, iya ginpahayag nga isa ka maayo nga balita nga indi na kinahanglan nga ipaidalom sa Community Quarantine ang bug-os nga probinsya epektibo Mayo 16.
Suno kay Defensor, nagakahulugan lamang ini nga nangin epektibo ang ginapatigayon nga preventive measures kag sa pagkamatuod, ang asymptomatic patients na lang ang ginapaidalom sa monitoring.
Ginpahayag ni Defensor nga sapulon niya ang tanan nga alkalde agud istoryahan kun ano ang kaundan sang igapatuman nga exit plan sa idalom sang Low Risk category.
Magluwas diri, makigsapol man siya sa iban pa nga opisyal sa Western Visayas kag lakip na sa Regional Inter-Agency Task Force agud nga mangin uniform ang ipatuman nga restrictions.
Apisar nga indi na kinahanglan ang Community Quarantine sa Iloilo, dapat sa gihapon nga sundon ang basic protocol kasubong sang pagsuksok sang facemask, pagsunod sa physical distancing kag proper hygiene tubtub nga mabalik sa kinaadan ang sitwasyon.
