ILOILO CITY – Nagsabat ang residente sang Brgy. Tanza Baybay, Iloilo City nga gintudlo ni Punong Barangay Dominador Deocampo nga amo ang sa likod sang paghimo sang troll account nga ‘Joyce Spring’ nga nagapakalain sa ila barangay.
Nahibaluan nga sa nasambit nga Facebook page, ginbulgar nga ginbuhinan sang P1,500 ang nabaton nga cash assistance sang mga benepisyaryo sang Social Amelioration Program.
Sa exclusive interview sang Bombo Radyo kay Nenita Lozada, iya ginpahayag nga wala sang kamatuuran ang pahayag ni Punong Barangay Deocampo nga siya ang naghimo sang troll account.
Suno kay Lozada, nagalain gid ang iya buot bangud siya ang ginatudlo nga nagapangguba batok sa Punong Barangay.
Sa pagkamatuod suno sa natungdan, keypad lang ang iya cellphone rason nga wala siya sang ikasarang nga maghimo sang Facebook account.
Ginpahayag man sang tagreklamo nga sa iya pamilya, siya lang ang nakabaton sang ayuda kun sa diin daw kaangay nga ginadumtan sila.
Sa pihak sini, indi niya mabatas nga pakalainon si Deocampo apang wala siya nagalaum nga ginakabig siya nga tsismosa sang Punong Barangay.
