ILOILO CITY – Nag-umpisa na subong nga adlaw ang More Electric and Power Corporation sa ila nga Operation kontra Jumper sa syudad sang Iloilo.
Katuyu-an sang nasambit nga lihok amo nga malikawan ang illegal connection sa syudad.
Sa pagtsekyar sang More Electric and Power Corporation sa Barangay Hipodromo, Iloilo City Proper kahapon, nakit-an sini ang mga illegal connection apang sang ila ginbalikan kaina sang aga, nakakas na ini.
Apang sa paglibot sang mga katapo sang nasambit nga power distributor, nakit-an nila ang isa ka balay nga naga “jumper” sa poste.
Sa interview sang Bombo Radyo kay Nay Emma , tag-iya sang balay nga nadakpan nga naga illegal-connect, iya ginpahayag nga sa poste na lamang sila naga-angot bangud ginkuha sang Panay Electric Company ang ila nga kuntador sa rason nga napaslawan ini makabayad sang kuryente sadto.
Suno kay Emma, gintinguhaan man niya nga bawion ang ila nga kuntador sa Panay Electric Company apang ginsukot siya sang P100,000.
Bangud wala ini sang nasambit nga kantidad, wala na lang niya ginkuha ang kuntador kag nag-angot na lamang sang kuryente sa poste.
Nakahibalo man si Emma nga sala ang iya ginhimo kag gin-abisohan siya sang More Power nga mag apply na lang sang panibag-o nga kuntador.
