ILOILO CITY – Kapin sa 23,000 pa ka benepisyaryo sang Social Amelioration Program sa syudad sang Iloilo ang wala pa nahatagan sang cash assistance as of May 14.
Sa interview sang Bombo Radyo kay Iloilo City Mayor Jerry Treñas, iya ginpahayag nga apisar nga sang Mayo 10 pa ang deadline sang cash distribution, nag-abiso ang Department of the Interior and Local Government nga padayunon ang pagpanghatag sang kwarta.
Suno kay Treñas, lakip sa mga rason kun nga atrasado ang cash distribution amo ang ginapatuman nga social distancing, pagka-ubos sang kwarta sa bangko kag ang lain-lain nga guidelines sa pagpili sang benepisyaryo.
May kaangtanan naman sa 43 ka mga Local Chief Executives sa Western Visayas nga padal-an sang show cause order matapos napaslawan nga sundon ang deadline, ginpahayag sang alkalde nga wala siya sang ideya kun bala nalakip ang syudad sang Iloilo.
Ginpahayag sang alkalde nga nakahanda na siya sa pagplastar sang mga rason kun nga-a tubtub subong wala pa natapos ang cash distribution.
Wala pa sang may nabaton nga abiso gikan sa central office sang Department of the Interior and Local Government si City DILG Officer Roy Defiño kun bala isa si Mayor Jerry Treñas sa mga Local Chief Executives nga padal-an sang show cause order.
Suno kay Defiño, masobra pa lang sa katunga ang nahatagan sang cash assistance sa syudad sang Iloilo rason nga iya gin-abisuhan ang akalde nga kun mahimo, hingagawon ang pagpanghatag sa labing madali nga tion.
Sa subong suno kay Defiño, ang abiso sang central office amo nga padayunon lamang ang cash distribution tubtub nga wala ginabawi sang Department of Social Welfare and Development ang pondo nga ginhatag sa Local Government Unit.
