ILOILO – Lunsay wala pa nakabaton sang show cause order ang mga alkalde sang Alimodian kag Leon, Iloilo matapos nga wala nalab-ot ang 80% threshold sa cash distribution sang Social Amelioration Program.
Ini matapos nga nalakip ang duha ka banwa sa 42 ka mga Local Government Unit sa Western Visayas nga wala nakalab-ot sa threshold sa gintalana nga deadline sang Mayo 10.
Sa interview sang Bombo Radyo kay Mayor Geefre ‘Calay’ Alonsabe sang Alimodian, Iloilo, iya ginpahayag nga iya nakita sa website sang Department of the Interior and Local Government nga nalakip ang ila banwa sa mga wala nakalab-ot sa 80%.
Suno kay Alonsabe, 77% lang ang accomplishment sang Alimodian bangud sa pila ka mga rason kasubong sang lain-lain nga guidelines sang Department of Social Welfare and Development kag ang madamo nga reklamo nga ginapalab-ot sa Local Government Unit.
Ginpahayag ni Alonsabe nga iya nga ginpalab-ot sa Department of Social Welfare and Development ang mga reklamo apang atrasado man ang paghatag sang solusyon.
Kun nasapar lang suno sa alkalde, mahimo nga nalab-ot pa sang Alomodian ang 80% nga threshold.
Samtang, magluwas sa lain-lain nga guidelines, isa man sa pagpanghangkat para kay Mayor Ma. Lina Holipas sang Leon, Iloilo amo ang data sa mga barangay nga napahamtang sa nabukid nga bahin.
Sa pagpaathag ni Holipas, nakahanda na ang iya mga rason sa tion nga mabaton na niya ang kopya sang show cause order.
Suno kay Holipas, gina id-iran gid ang validation sa mga pangalan agud nga ang mga makabaton lamang amo ang mga kwalipikado nga benepisyaryo.
Indi siya maluyag suno sa alkalde nga may yara sang benepisyaryo nga bawi-an sang cash assistance sa tion nga ma disqualify sa validation sang Department of Social Welfare and Development.
