ILOILO CITY- Nagdangat na sa 92% sang mga Local Government Unit sa Western Visayas ang nakatapos na panghatag sang cash assistance sa idalom sang Social Amelioration Program.
Sa interview sang Bombo Radyo kay May Castillo, spokesperson sang Department of Social Welfare and Development Region 6, iya ginpahayag nga sa 133 ka mga LGU sa Western Visayas, 85 palang ang nakatapos sang ila pay out.
Suno kay Castillo ang numero ang ginalakipan sang 10 ka banwa sa Aklan, 16 sa Antique, 16 sa Capiz, tanan nga kabanwahanan sa Guimaras, 20 sa Iloilo kag 18 sa Negros Occidental.
Pahayag pa ni Castillo, padayun naman ang pay out sa 24 ka mga kabanwahanan sa Iloilo lakip na sa syudad, 14 sa Negros Occidental lakip na ang Bacolod City, 7 sa Aklan, duha sa Antique kag Roxas City.
Halos 1,068,927 ka mga family beneficiaries sa rehiyon ang nakabatun sang P6,000 nga cash aid, sa diin naglab-ot sa P6,373,194,000 ang kabug-usan sang cash nga napanghatag.
Dugang pa sang natungdan, padayun nila ginapahanumdum sa sa tagsa ka mga Local Government Unit nga sundon ang physical distancing , kinahanglan nga may yara sang face mask ang mga makuha sang amelioration kag nagakadapat nga ang area nga patigayunan sang pay out ang may sanitation area.
