ILOILO CITY – Mahimo sa gihapon nga makahingyo sang extension ang mga Local Government Unit nga wala pa nakatapos sa pagpanghatag sang cash assistance sa Social Amelioration Program.
Ini matapos nga 85 gikan sa 133 ka Local Government Unit sa Western Visayas ang nakatapos sa cash distribution.
Sa interview sang Bombo Radyo kay Mae Castillo, tagpamaba sang Department of Social Welfare and Development 6, iya ginpahayag nga padayunon ang cash distribution ilabi na sa mga lugar nga wala pa nakalab-ot sa 100% nga accomplishment.
Suno kay Castillo, ang Local Government Unit na ang magapadala sang request direkta sa Department of the Interior and Local Government kag hatagan lang sang kopya ang Department of Social Welfare and Development.
Ginpahayag ni Castillo nga sa Rehiyon 6, ang Guimaras pa lang ang may 100% nga accomplishment, 95.05% ang Aklan, 996.6% ang Antique, 98.79% ang Capiz, 82.12% ang Iloilo Province kag Iloilo City samtang 98.34% naman ang Negros Occidental kag Bacolod City.
Sa probinsya sang Iloilo, 20 pa lang ka banwa ang nakatapos sa cash distribution samtang ang Roxas City naman sa Capiz ang wala pa nakatapos sa payout.
Lakip sa mga rason kun nga-a atrasado ang cash distribution amo ang ginapatuman nga health protocol, security issues kag ang kakulang sa manpower.
Sa subong, naglab-ot sa masobra 1.6 million nga benepisyaryo ang nahatagan samtang masora sa P6.3 billion ang kabug-usan nga pondo nga napanghatag.
