IRELAND – Maga-umpisa na buwas, Mayo 18, ang pagpatuman sang Phase 1 sang pagbuhin sang restrictions sa Ireland kasunod sang pagnubo sang na record nga kaso sang Coronavirus Disease 2019 (COVID-19) sa tagsa ka adlaw.
Suno kay Bombo International Correspondent Steven Mark Espinosa, nagatrabaho bilang threat researcher sa Dublin, Ireland, naglab-ot na sa 24,048 ang kabug-usan nga COVID-19 cases, 19,470 naman ang naka recover kag 1,533 ang ginbawi-an sang kabuhi.
Ginpahayag ni Espinosa nga sa subong, ginakabig na nga low risk ang Ireland kun COVID-19 ang pagahambalan kun sa diin istrikto nga ginapatuman ang 2-km radius checkpoint, social distancing kag ang husto nga pagsuksok sang face mask.
Kasubong sa iban nga mga pungsod, apektado man ang ekonomiya sang Ireland bangud sa pagsirado sang Small and Medium Enterprises kun sa diin ang mga nadulaan sang trabaho ang may yara sang weekly benefits gikan sa gobyerno.
Ginadumili-an man ang pagpatigayon sang mass gathering, kanselado ang byahe, ginapaagi lamang sa online ang klase kag limitado lang sa drive-thru kag delivery ang serbisyo nga ginatanyag sang restaurants kag fast food chains.
Apisar sini, ginpahayag ni Espinosa nga gamay lamang ang nadulaan sang trabaho sa Ireland kun ipaanggid sa iban nga mga pungsod bangud nga ang kalabanan sa mga apektado ang empleyado sang Small and Medium Enterprises.
Apisar sang madamo nga backlog sa mass testing sa una nga semana humalin sang nag-umpisa ang pandemya, ginpahayag sang natungdan nga nangin madasig ang pag-aktu sang gobyerno sang Ireland paagi sa pagbakal sang madamo nga test kits kag Personal Protective Equipment.
