ILOILO CITY – Ginabanta nga 500 nga pasahero ang na stranded sa Hibao-an Terminal, subong nga adlaw, Mayo 18, bangud nga wala sang may nagbyahe nga depampasahero nga jeep.
Sa interview sang Bombo Radyo kay Arnold Bilbao, operator sang Hibao-an Terminal, iya ginpahayag nga kadam-an sa mga pasahero ang aga pa nga nagpila apang nalipasan lang sang pila ka oras, wala gid sila nakasakay bangud nga wala sang may nagbyahe nga depampasahero nga jeep magluwas lang sa Ceres bus.
Suno kay Bilbao, tuman ka kulang kun bus lang ang saligan ilabi pa nga nag-umpisa naman ang trabaho sa syudad sang Iloilo.
Ginpahayag ni Bilbao nga bisan siya ang naluoy bangud nga nagpauli na lang ang kalabanan sa mga pasahero.
Indi man mabasol ang mga driver suno sa natungdan bangud nga may yara sang kapaltahan sa bahin sang concerned agencies kag kasubong nga ginapabudlayan ang mga operator paagi sa requirements.
