METRO MANILA – 83 sa 84 ka Overseas Filipino Workers nga nagatinir sa MV Pope John Paul II nga barko sa Metro Manila ang nagahulat sa gihapon sang resulta sang swab test agud nga makapauli.
Sa interview sang Bombo Radyo kay Allan John Echin sang Ajuy, Iloilo, iya ginpahayag nga sang Abril 16 pa siya nag-abot sa Metro Manila kag ang iya mga kaupod nga Overseas Filipino Workers ang masobra naman sa isa ka bulan nga nagapabilin sa nasambit nga barko.
Suno kay Echin, ang Philippine Coast Guard ang nagpatigayon sang swab test sang Mayo 7 apang tubtub subong, wala sa gihapon sang resulta magluwas lang sa swab test sang isa nila ka upod.
Ginpahayag ni Echin nga ang iban nga Overseas Filipino Workers nga ulihi nga ginpaidalom sa swab test ang nakabaton na sang resulta apang sila ang wala man sa gihapon.
Magluwas diri, ginpahayag sang natungdan nga wala naman sang problema sa akomodasyon bangud nga adlaw-adlaw man ang monitoring sang Philippine Coast Guard.
Nahibalu-an nga ang mga Overseas Filipino Workers nga temporaryo nga nagatinir sa barko nga ginapanag-iyahan sang 2GO Travel ang lunsay tumandok sang Visayas kag Mindanao.
