ILOILO CITY– Naghingyo sang dugang nga car pass ang Iloilo City Loop Alliance of Jeepney Operators and Divers Association bangud nga madamo ang pasahero apang tuman naman ka gamay ang numero sang jeep nga nagabyahe.
Sa interview sang Bombo Radyo kay Raymundo ‘Boyet’ Parcon, Presidente sang Iloilo City Loop Alliance of Jeepney Operators and Divers Association, iya ginpahayag nga anum pa lang ka ruta sa subong ang nahatagan sang permit sang Land Transportation Franchising and Regulatory Board.
Suno kay Parcon, ang Mandurriao nga ruta ang may apat ka car pass, lima sa SM City, pito sa Calumpang, 53 sa Tagbak, 10 sa Mohon, tatlo sa Fundidor kag duha sa Baluarte samtang wala pa sang car pass ang mga ruta nga ginalakipan sang La Granja, Ticud, Villa Baybay, kag iban pa.
Ginpahayag ni Parcon nga ginahulat na lang nga mahatag ang dugang nga 25% nga permit agud maakomodar ang kadamuon sang mga pasahero sa syudad.
Pila sa mga rason sa mahinay nga approval sang special permit amo ang indi kumpleto nga mga dokumento kaangay sang expired nga insurance.
Nahibaluan nga sa subong, padayun nga ginakulang sang salakyan sa syudad bangud sa pagbalik sang mga empleyado sa trabaho.
