GUIMBAL, ILOILO – Ginapakamalaot sang Police Regional Office 6 ang aktu sang pulis nga nagpalusot sang makahulubog nga ilimnon sa Brgy. Nanga, Guimbal, Iloilo.
Sa interview sang Bombo Radyo kay Police Lt. Col. Gilbert Gorero, acting Public Information Officer sang Police Regional Office 6, iya ginpahayag nga wala ginapahanugutan sa hanay sang Philippine National Police ang nasambit nga aktu.
Suno kay Gorero, kaangay sa tatlo ka mga pulis nga nauna na nga nadakpan nga nagpalusot sang makahulubog nga ilimnon, si Police Staff Sergeant Jose Digcabo-on Jr. nga na aasign sa Regional Personnel Holding and Accounting Unit, ang pasakaan sang criminal kag administrative cases.
Ginpahayag ni Gorero nga kun indi masunod sang mga pulis ang ila trabaho, nagakadapat lang nga indi na nila pagsuksukon ang ila uniporme.
Ang nasambit nga aktu suno sa natungdan ang nagatuga lamang sang kahuy-anan sa bug-os nga hanay sang Philippine National Police.
Nahibalu-an nga si Digcabo-on ang nadakpan kaupod ang sibilyan nga si Leo Faldas, 47 anyos sang Zone 4, Boulevard, Molo, Iloilo City sakay sa shuttle van.
Ginapahayag nga ginpunggan pa sang pulis nga buksan ang shuttle van kun sa diin nakarga ang 60 ka box sang ilimnon.
