ILOILO CITY – Pabor ang Liga ng mga Barangay sa pahayag ni Iloilo City Mayor Jerry Treñas nga ang Philippine National Police kag ang Philippine Army na ang magapanguna sa pagpanghatag sang Social Amelioration Program.
Sa interview sang Bombo Radyo kay Punong Barangay Roberto Niño, tagpamaba sang Liga ng mga Barangay, iya ginpahayag nga wala sang problema sa nangin pahayag sang alkalde bangud nga luyag lamang niya nga mapadasig ang cash distribution.
Suno kay Niño, magabulig sa gihapon ang mga barangay official sa pagpanghatag sang cash assistance bangud nga ini ang nalakip sa ila katungdanan.
Ginpahayag ni Niño nga ang pabag-o bag-o nga guidelines amo ang nagapaatrasar sang cash distribution.
Pagkatapos sang Social Amelioration Program, ginpahayag naman ni Iloilo City Mayor Jerry Treñas nga ipanghatag na umpisa sa masunod nga semana ang social pension.
Suno kay Treñas, P52 million ang pondo nga ginhatag sang Department of Social Welfare and Development para sa 2019 kag 2020 nga social pension.
Ginpahayag ni Treñas nga magalab-ot sa 15,000 nga senior citizen sa syudad sang Iloilo ang natumod nga benepisyaryo sang P500 kada bulan.
Ang senior citizen nga may manubo sa P6,000 nga pension kag ang mga wala nakabaton sang iban nga ayuda halin sa gobyerno amo ang kwalipikado nga makabaton sang social pension.
