ILOILO – Isa naman ka pulis ang nadakpan nga nagpalusot sang 69 ka box sang makahulubog nga ilimnon sa checkpoint sa Brgy. Velasco, Lemery, Iloilo.
Sa interview sang Bombo Radyo kay Police Lt. Col. Mario Baquiran Jr., commanding officer sang 2nd Iloilo Provincial Mobile Force Company, iya ginpahayag nga ginakasubo gid niya nga isa sa iya nasakupan ang nadakpan nga nagpalusot sang makahulubog nga ilimnon apisar sang liquor ban.
Suno kay Baquiran, iya nga iduso nga i-relieve sa pwesto si Police Staff Sergeant Joe Marc Ebon nga naglinsensya pa nga magapauli sa ila balay sa Brgy. Zerrudo, Sara, Iloilo.
Ginpahayag ni Baquiran nga sakay sa itom nga Toyota Hilux ang nasambit nga pulis kaupod ang mga sibilyan nga sanday Cyrus Erl Del Castillo nga amo ang nagaserbe nga driver kag tag-iya sang salakyan, Elvin Adorable kag Mariano Borlado.
Sa Capiz ginbakal ang ilimnon kag tuyo nga dal-on sa banwa sang Sara apang gilayon nga nakumpiska sa checkpoint sa banwa sang Lemery.
Ginpromisa naman ni Iloilo Police Provincial Office Director Police Col. Paul Kenneth Lucas nga wala sang cover-up nga matabo sa kaso nga ginakaulamiran sang mga pulis nga nadakpan nga nagapalusot sang makahulubog nga ilimnon.
Suno kay Lucas, pasakaan sang nagakaigo nga kaso si Police Staff Sergeant Joe Marc Ebon kasubong sa apat ka mga pulis nga nauna nga nadakpan.
Ginpahayag ni Lucas nga pulis man ukon sibilyan, wala sang pasin-uhon ang Iloilo Police Provincial Office may kaangtanan sa ginapatuman nga liquor ban.
