ILOILO CITY – Gin-athag ni Punong Barangay Alain Rey Depatillo sang Rizal Pala-Pala 1, Iloilo City nga wala siya nag-inom sang makahulubog nga ilimnon sang gindakop sang pulis samtang yara sa sulod sang Iloilo Terminal Market.
Sa interview sang Bombo Radyo kay Depatillo, iya ginpahayag nga sang amo nga tion, nagbakal siya sang bulong para sa hapo sa isa ka botika malapit sa nasambit nga merkado.
Suno kay Depatillo, nag-agi siya sa sulod sang merkado kag gintawgan siya ni Punong Barangay Woody Dela Riarte sang Kauswagan, Iloilo City kag ginhagad sa isa ka kapehan.
Natabu-an suno kay Depatillo nga may yara sang naga-inom sang makahulubog nga ilimnon sa pihak nga lamesa apang sang nag-abot ang mga pulis, sila ang nalakip sa mga gindakop.
Ginpahayag sang Punong Barangay nga wala siya nagapahubog bangud nga may yara siya sang hapo kag sa pagkamatuod, iya pa nga ginpakita sa pulis ang ginbakal nga bulong.
Magluwas kanday Depatillo kag Dela Riarte, gindakop man sanday Noel Capalla, anay Punong Barangay sang Cochero, Molo; Jose Alexis Rojo; Rigor Porras; Roel Villarimo; Melchor Manuel Blancaflor; Maria Paz Domingo nga tag-iya sang kapehan; Rick Seguiter Jr.; Marki Bergantinos kag Martie Matias.
Nahibalu-an nga isa ka concerned citizen ang nagpalab-ot sang impormasyon sa mga pulis apang bangud sa kakulang sang witness kag ebidensya, gilayon nga ginpapauli ang mga arestado.
