ILOILO CITY – Tatlo ka rason ang ginplastar ni Iloilo City Mayor Jerry Treñas kun nga-a dapat nga ipaiway anay ang klase sa syudad sang Iloilo.
Ini ang kasunod sang pagpadala sang appeal letter ni Treñas kay Department of Education Sec. Leonor Briones nga napetsahan Mayo 22, 2020.
Sa interview sang Bombo Radyo kay Treñas, iya ginpahayag nga nakasaad sa appeal letter nga mas makapaayo nga sa masunod na lang nga tuig padayunon ang opening of classes sa baylo nga sa Agosto 24 bangud sa pila ka mga rason.
Lakip diri amo nga wala pa sang bakuna batok sa COVID-19, natural instinct sang kabataan nga mangin rason nga indi mapatuman ang physical distancing kag ang pagsuksok sang face mask kag ang kakulang sang masakyan sa syudad sang Iloilo.
Bilang alkalde, iya ginabalak-an nga posible nga magdamo pa ang COVID-19 cases sa tion nga mag-umpisa na ang klase.
May kaangtanan diri, ginpahayag naman ni Sec. Briones nga nabaton na niya ang appeal letter sang alkalde apang sa subong, iya anay ini nga pagatun-an.
Suno sa tiglikom, deretso niya nga ipahibalo sa alkalde kun ano man ang iya mangin desisyon.
