ILOILO – Kasubong nga nagdugay kag nagbudlay ang proseso sa pagpauli sang local strandees kasunod sang panibag-o nga advisory sang National Task Force Against COVID-19 nga napetsahan sang Mayo 13, 2020.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga kahapon lamang niya nabaton ang kopya sang nasambit nga order.
Kun sadto suno kay Dr. Bionat, Local Government Unit na ang nagabayluhanay sang koordinasyon apang sa subong, kasubong nga nagkumplikado na ang proseso.
Sa bahin sang Iloilo Provincial Government, ginpahayag ni Dr. Bionat nga ang tagsa ka talatapan sa kapitolyo ang may yara sang nagkalain-lain nga katungdanan rason nga ginatos ka local strandees ang nakapauli sa Iloilo.
Kasunod sang ginpaguwa nga panibag-o nga advisory, ang Local Government Unit ang wala sang kinamatarong nga magpangindi sa Local Stranded Individual nga ginpahanugutan sang National kag Regional Task Force lakip na sang concerned agencies.
Ang Local Stranded Individual ang subject sa local health protocol nga ginapatigayon sa lugar nga paulian kasubong sang 14-day quarantine.
May kaangtanan naman sa isa ka pamilya nga halin sa Caloocan City kag nagpauli sa Pototan, Iloilo, ginpahayag sang natungdan nga nag-apply sang requirements ang walo ka miyembro sang nasambit nga pamilya.
Ang problema lang suno kay Dr. Bionat amo nga wala pa napirmahan ni Mayor Adi Lazaro ang Certificate of Coordination and Validation nga amo naman ang igapasa kay Iloilo Gov. Arthur Defensor Jr., apang naka-abot na sa Pototan ang nasambit nga pamilya.
Nahibalu-an nga naghingyo ang nasambit nga pamilya nga magpauli sa Pototan agud nga magtambong sa lubong sang ila himata apang ginakwestyon sang alkalde ang pila ka teknikalidad sa requirements kag kun paano sila nakalab-ot sa Iloilo.
