(PHOTO BY: PHILIPPINE NAVY)
SUBIC, ZAMBALES- Nag-abot na sa Subic, Zambales ang pinakauna nga missile-capable warship sang Philipine Navy matapos ang lima ka adlaw nga maiden journey gikan sa South Korea.
Ang FF150 ang pagahingalanan nga BRP Jose Rizal sa tion nga igakomisyon na ini sa serbisyo.
Suno kay Commander Offshore Combat Force Commodore Karl Decapia, ang pag-abot sang FF150 ang nagapakita sang amat-amat nga plano para sa mas moderno nga Philippine Navy sa pagdepensa sa teritoryo sang Pilipinas.
Magapaidalom sa mandatory 14 day quarantine ang mga sailing crew bilang kabahin sang protocol sang gobyerno agud malikawan ang paglapta sang Coronavirus Disease 2019 (COVID-19).
Ang bag-o nga warship ang may maximum desired speed nga 25 knots, cruising speed nga 15 knots kag range nga 4,500 nautical miles.
Ang nasambit nga warship ang may yara sang missiles, torpedoes kag iban pa nga weapon systems.
Ang 107-meter long nga vessel ang may ikasarang para sa anti-surface, anti-air, anti-submarine kag electronic warfare.
Mahimo man ini nga makatiner sa kalalawran sa sulod sang dire-diretso nga 30 ka adlaw.
Suno sa Philippine Navy, sini lang nga sabado sang ginhatagan sang tradisyunal nga passing honors ang barko, sa pagpanguna sang BRP Andres Bonifacio kag sang tatlo ka multipurpose assault crafts (MPACS’)
Gin abi-abi man ni Philippine Fleet commander, Rear Adm.Loumer Bernabe ang tanan nga crew sang FF150, lakip na ang PN Frigate Owners, kag support team gikan sa South Korea
Ini ang una sa duha ka mga frigates nga ginkontrata sang Pilipinas sa Hyundai Heavy Industries shipyard sa Ulsan City, South Korea.
Iga deliver ini kun tani sang Abril apang na-atrasar bangud sa pandemya.
Ang ika duha naman nga frigate nga pagahingalanan bilang BRP Antonio Luna, ang maga-abot antes matapos ang 2020.
Ang Commissioning Ceremony ang inisyal nga hiwatun sa Hunyo 19, kadungan sang kaadlawan ni Dr. Jose Rizal.
