ILOILO CITY – Wala nakalampuwas sa homily ni Msgr. Meliton Oso, director sang Jaro Archdiocesan Social Action Center, ang indi patas nga pagtrato sang gobyerno sa manggaranon kag imol.
Sa misa nga ginpatigayon sa Jaro Metropolitan Cathedral, gin isa-isa ni Msgr. Oso ang mga hitabo nga nagapakita sang unfair treatment sa tunga sang maggaranon kag imol ilabi na subong nga may yara ang Coronavirus Disease 2019 (COVID-19) pandemic.
Suno kay Msgr. Oso, apisar nga may yara sang philosophic kag jurisprudential concept nga ‘separation of church and state’ apang indi man mahimo nga magpabulag-bulag na lang ang Simbahang Katolika sa mga nagakatabo nga inhustisya sa pungsod.
Sa baylo nga konsiderasyon kag pagpalangga ang magpangibabaw, may yara sa gihapon sang mga nagapamintaha ilabi na sa patag sang pagnegosyo.
May kaangtanan naman sa lihok sang Simbahang Katolika agud nga mapadayon ang pagpalapnag sang maayong balita, ginpahayag ni Msgr. Oso nga ginatun-an pa kun ano pa gid nga mga health protocol ang ipatuman samtang nagapadayon ang quarantine.
