GUIMBAL, ILOILO – Ginakabig sang labing una nga COVID-19 survivor sa Iloilo nga divine intervention ukon milagro ang iya pag-ayo gikan sa infectious disease.
Sa Good Morning Philippines program, ginpahayag ni Tony Gelvero, 65 anyos sang Guimbal, Iloilo, nga bisan siya ang indi makapati nga iya nalampuwasan ang nasambit nga pagtilaw.
Tubtub subong, ginpahayag ni Gelvero nga wala siya sang ideya kun paano niya nakuha ang virus bangud nga lunsay nagnegatibo ang tanan niya nga himata nga naghalin sa Japan.
Marso 21 sang nakumpirma suno kay Gelvero nga positibo siya sa COVID-19 apang antes pa man sini, nagabatyag na siya nga daan sang pabalik-balik nga hilanat tubtub nga naadmit kag na comatose sa hospital sa syudad sang Iloilo.
Bisan ang doktor ang nagakabalaka sa posible matabo sa tion nga kakason na ang tubo nga gintakod sa iya apang sa wala ginlauman, amat-amat nga nag-estable ang iya sitwasyon.
Marso 27 suno kay Gelvero ang pinakamasadya nga adlaw para sa iya pamilya bangud nakumpirma nga siya ang labing una nga COVID-19 survivor sa Iloilo.
Lakip sa mga pagpanghangkat nga iya naagyan samtang nagapakigbato sa COVID-19 amo ang paglapta nga fake news nga ginbawi-an na siya sang kabuhi kag bisan ang iya pamilya ang naka-eksperyensya man sang diskriminasyon.
Sa pihak sini, daku ang pagpasalamat sang natungdan bangud nga nalampuwasan niya kag sang iya pamilya ang pagtilaw paagi sa himpit nga pagtuo sa Ginuo.
Bilang survivor, ginpahayag sang natungdan nga indi dapat magdula sang paglaum ang mga pasyente nga padayon nga nagapakigbato sa ginabatyag nga balati-an.
