SPAIN– Naga-amat-amat na balik sa kinaandan ang sitwasyon sang Spain matapos tuman nga naapektuhan bangud sang coronavirus disease 2019.
Sa interview sang Bombo Radyo kay Bombo International Correspondent Gail Daylo direkta sa Spain, iya ginpahayag nga naga-amat-amat na nagabukas ang pila ka mga negosyo.
Suno kay Daylo, mahimo na makagwa ang mga pumuluyo, apang may yara lang sang natalana nga oras sa diin las 6:00 tubtob las 10:00 sang aga, mahimo makagwa ang mga tawo agud mapatigayun sang aktibidad may kaangtanan sa sports, apang sarado sa gihapon ang mga gyms, las 10:00 tubtob las 11:00 mahimo makagwa ang mga tigulang, las 12:00 sang udto tubtob las 7:00 sang gab-i mahimo makagwa ang mga kabataan, las 7:00 tubtob las 8:00 sa gab-i ang mga tigulang kag las 8:00 tubtob las 10:00 sang gab-i mahimo makapatigayun sang sports.
Natalana man suno sa iya nga magbukas ang hotels, kag posible pahanugutan ang outside dine-in sa mga restaurants, apang may yara sang duha ka metros nga antad ang tagsa ka customer.
Padayun man suno kay Daylo ang pagpatuman sang mga pagsulundan kaangay sang physical distancing, kag paggamit sang face mask sa diin sa tion nga madakpan nga wala sang facemask, may yara sang nagakaigo nga multa.
Pahayag pa niya, yara naman sa 70% ang pampubliko nga transportasyon sa Spain, kag kinahanglan may yara sang facemask sa tion nga magsakay.
Apisar may COVID-19 suno sa natungdan, ginpahanugutan nga magbukas ang mga wine stores sang nasambit nga pungsod.
Nahibaluan nga ang Spain ang may yara sang 236,000 ka kumpirmado nga kaso, 150,000 ang nakarekober, kag 28,752 ang nagkalamatay
