ILOILO CITY– Nagreklamo sa Department of the Interior and Local Government ang himata sang isa ka senior citizen bangud sa ginapahayag anomaliya sa tagtaganay sang Social Amelioration Program sa Brgy. West Timawa, Molo, Iloilo City.
Sa interview sang Bombo Radyo sa tagreklamo nga si Jun Jun Dela Cruz, iya ginpahayag nga nakibot sila sa kun nga-a wala nadala sa mga benipesyaryo ang iya amay nga wala man sang may ginabaton nga pensyon.
Suno kay Dela Cruz, naglain ang buot sang iya amay bangud nga ang kasubong niya nga senior citizen nga wala man sang pensyon ang nadala sa listahan.
Ginpahayag ni Dela Cruz nga wala man sang may ginpaskil nga listahan sa ila barangay hall kag sa pagkamatuod, may yara pa sang barangay official nga nakabaton sang cash aid.
Sa bahin naman sang relief goods, isa ukon makaduha lang ka bes nga nakabaton ang iya amay kag sang ulihi nga tagtaganay, wala ini nahatagan.
Gin-athag man sang natungdan nga ang iya pagreklamo ang para lamang sa hayag nga sistema sa pagpili sang benepisyaryo.
Nagsabat naman si Punong Barangay Nelly Magsipoc nga gindala sa listahan sang mga benipesyaryo ang amay sang tagreklamo apang sang gin-validate sang Department of Social Welfare and Development, nahibaluan nga indi ini kwalipikado.
Suno kay Magsipoc, mismo ang Department of Social Welfare and Developmen ang nagadesisyon kag sila nga mga opisyal sang barangay ang nagaplastar lamang sang pinal nga listahan.
Ginpahayag ni Magsipoc nga luyag niya athagon nga indi siya ang nagapili kag wala niya ginapulitika ang listahanay sang SAP beneficiaries.
Sa bahin naman sang relief goods, luyag niya ipahibalo suno kay Magsipoc nga nakabaton sang bulig ang amay sang tagreklamo bangud may yara man sang documentation bilang pamatuod.
Kun may yara sang inugpanghatag nga goods suno sa Punong Barangay, ginasigurado niya nga ang tanan nga pumuluyo ang mahatagan.
