ILOILO CITY – 455 sa 478 ka Overseas Filipino Workers nga sakay sang barko nga St. Therese Child of Jesus ang nag-abot sa syudad sang Iloilo.
Pasado 5:00 kaina sang hapon, Mayo 25, sang nagdungka sa Philippine Ports Authority terminal ang nasambit nga barko nga ginapanag-iyahan sang 2Go.
Sa pagpaathag sang Office of Civil Defense, 23 ka Overseas Filipino Workers ang no show sa adlaw sang repatriation rason nga 455 lamang ang nakasakay sa barko.
Sa 478 ka Overseas Filipino Workers, 47 ang sa Aklan, 37 sa Antique, 66 sa Capiz, 17 sa Guimaras, 235 sa Iloilo kag 76 sa Iloilo City.
Magluwas diri, may yara man sang tatlo ka batch sang repatriated Overseas Filipino Workers nga nagpauli sakay sa separado nga sweeper flights.
Ang mga nakasakay sa barko ang ginsugat sang ambulansya ukon bus agud idul-ong sa mga quarantine facility para sa COVID-19 test samtang ang iban naman nga nakasakay sa eroplano ang temporaryo nga ginpatinir sa Iloilo Sports Complex para sa swab testing.
Suno naman kay John Baldomero, utod sang isa sa mga Overseas Filipino Workers nga nakasakay sa barko, iya ginpahayag nga madugay pa ang hulat sang mga Overseas Filipino Workers nga natag syudad sang Iloilo antes nakasakay sa bus agud nga idul-ong sa quarantine facility.
Ginpahayag ni Baldomero nga anum ka bulan na nga nagabusong ang iya utod nga halin sa United Arab Emirates rason nga tuman ang iya nga pagkabalaka.
Sa pihak sini, wala man sang problema sa akomodasyon sang iya utod sa Metro Manila sa sulod sang pila ka bulan nga pagka stranded.
