ILOILO – Gindayaw sang Police Regional Office 6 ang kapisan sang mga pulis nga naga duty sa border checkpoints nga nagresulta sa asud-asud nga pagkumpiska sang makahulubog nga ilimnon sa probinsya sang Iloilo may kaangtanan sa ginapatuman nga liquor ban.
Sa interview sang Bombo Radyo kay Police Lt. Col. Gilbert Gorero, acting Public Information Officer sang Police Regional Office 6, iya ginpahayag nga ang asud-asud nga accomplishment ang nagapakita lamang sang kapisan sang mga pulis nga naga duty sa border checkpoints.
Suno kay Gorero, kun indi tungod sa dedikasyon sang mga pulis, indi madakpan ang mga nagapalusot sang kinarton-karton nga makahulubog nga ilimnon kun sa diin ang iban sa mga nagkaladakpan amo ang mga pulis.
Ginpahayag ni Gorero nga pasakaan gid sang kaso ang mga nagkaladakpan bangud sa paglapas sa liquor ban kag gindayaw ang pagpamuno ni Iloilo Police Provincial Office Director Police Col. Paul Kenneth Lucas.
