ILOILO CITY – Indi na kinahanglan ang quarantine pass ukon travel authority sa tion nga magbyahe sa bug-os nga Western Visayas sa tion nga ipatuman na ang Modified General Community Quarantine epektibo Hunyo 1.
Ini ang ginkumpirma ni Iloilo City Mayor Jerry Treñas matapos ang ginpatigayon nga pagsinapol subong nga adlaw, Mayo 28, kaupod ang tanan nga gobernador sa rehiyon.
Sa interview sang Bombo Radyo kay Treñas, iya ginpahayag nga indi na pag-istriktuhan ang pagbyahe sa bug-os nga rehiyon apang may yara sa gihapon sang checkpoint kag kinahanglan ang pagsuksok sang face mask kag pagsunod sa physical distancing bilang kabahin sang new normal.
Suno kay Treñas, ginkasugtan man ang pagdumili sang air travel gikan sa iban nga lugar magluwas lang kun Overseas Filipino Workers kag Locally Stranded Individuals apang kinahanglan lang nga pahibaluon gilayon ang Local Government Unit agud nga makahanda.
May kaangtanan naman sa pagpahanugot sa pagbyahe sang sakayang pandagat Iloilo-Bacolod vice versa, ginpahayag ni Treñas nga paga-istoryahan pa ini agud nga maplastar ang protocol nga ipatuman paagi sa isa pa gid ka pagsinapol nga patigayunon.
Sa pihak sini, kinahanglan sa gihapon suno sa alkalde nga hitsuhon ang pila ka teknikalidad agud nga magsanto ang pagahimuon nga Executive Order sa rekomendasyon sang Inter-Agency Task Force.
May kaangtanan naman sa hingyo nga ilakip sa Modified General Community Quarantine, ginpahayag sang alkalde nga iya na nga ginplastar sa National Inter-Agency Task Force kun ano ang kapasidad sang Iloilo City.
Sa bahin sang medical grounds, ginpahayag sang natungdan nga magluwas sa medical professionals, may yara naman sang bastante nga isolation kag quarantine center, may dugang pa nga laboratory nga pagabuksan kag napahamtang man sa syudad ang mga dalagku nga hospital.
May trained professionals naman para sa pagpatigayon sang swab test sa tion nga may mag-abot nga Overseas Filipino Workers kag Locally Stranded Individuals.
Sa bahin naman sang economic grounds, 58% sang total local income ang naghalin sa Real Property Taxes kag Percentage Tax on Business.
Bangud sa pandemic, P300 million ang kulang sa collection sang Iloilo City Government kag kun magpadayon ang restrictions suno sa alkalde, lubos nga maapektuhan ang ekonomiya sang syudad sang Iloilo.
