LAMBUNAO, ILOILO – Ginpaboran ni Mayor Reynor Gonzalez ang pamunu-an sang West Visayas State University – College of Agriculture and Forestry may kaangtanan sa pagpanag-iya sang masobra sa 300 hectares nga duta sa Brgy. Jayubo, Lambunao, Iloilo.
Ini ang kasunod sang reklamo nga nabaton sang alkalde may kaangtanan sa pagpa-arado sang isa ka pamilya nga ginapahayag himata ni Ret. Police Col. Owen Lebaquin nga Medico Legal Officer sadto sang Police Regional Office 6 sa duta nga ginapanag-iyahan sang nasambit nga eskwelahan.
Sa interview sang Bombo Radyo kay Gonzalez, iya ginpahayag nga nagpangayo sa iya sang bulig ang pamunu-an sang nasambit nga eskwelahan tuhoy sa agaway nga nagakatabo.
Suno kay Gonzalez, ang naga-uyat sang titulo amo ang pamunu-an sang eskwelahan rason nga makabig nga trespassing ang ginhimu sang pamilya ni Lebaquin.
Ginpahayag ni Gonzalez nga bilang alkalde, luyag niya nga hitsuhon ang land dispute agud nga wala na sang gamo nga matabo.
Nakabaton man sang impormasyon si Gonzalez nga may gin-upod pa nga pulis ang Retired Police sa pagpadulong sa nasambit nga lugar kun sa diin suno sa alkalde, makabig ini nga illegal kun wala sang permit.
May kaangtanan diri, ginkuhaan sang Bombo News Team sang pahayag ni Ret. Police Col. Owen Lebaquin apang nagpamalibad siya nga maghatag sang recorded interview.
Ginpanindugan ni Lebaquin nga wala siya nagwaslik-poder kag sa baylo, naghingyo siya sang police escort.
