ILOILO CITY – Istrikto nga enforcement sang physical distancing kag pagsuksok sang face mask sa mga pampubliko nga lugar ang kabahin sang mandu ni Iloilo City Mayor Jerry Treñas sa masobra 200 ka compliance officers nga magabantay sa palibot sang syudad sang Iloilo.
Kadungan sang ginpatigayon nga send-off ceremony subong nga adlaw, Mayo 29, ginpahayag ni Treñas nga kinahanglan ang istrikto nga pagpatuman sang mga ordinansa may kaangtanan sa ginapatuman nga guidelines sa bug-os nga syudad sang Iloilo.
Suno kay Treñas, kinahanglan nga hatagan sang citation ticket, multahan kag kun kinahanglan nga dakpon ang wala nagasunod sa protocol, kinahanglan nga himuon ini sang compliance officers nga nakasuksok sang uniporme kag Identification Card.
Indi kinahanglan suno kay Treñas nga maglab-ot pa sa gamo ang strict enforcement apang gin-athag sang alkalde nga siya lang ang makamando sa pagpasirado sa mga commercial establishment nga wala nakasunod sa health protocol.
May kaangtanan diri, ginpahayag naman ni Public Safety and Transportation Management Office Head Jeck Conlu nga nagalaum siya nga tungdan sang maayo sang compliance officers ang ila trabaho.
Suno kay Conlu, sundon sang compliance officers ang mandu sang alkalde apang sa subong, hulaton anay ang pag-abot sang gin-imprinta nga citation tickets antes mapatuman ang pagmulta sa violators.
