ILOILO CITY – Naglab-ot na sa 10 ka kaso ang natigayon nga mapasaka sang Criminal Investigation and Detection Group may kaangtanan sa Social Amelioration Program sa Western Visayas.
Sa interview sang Bombo Radyo kay Police Col. Gervacio Balmaceda, pinuno sang Criminal Investigation and Detection Group 6, iya ginpahayag nga sa 10 ka kaso, 39 na ang naulamid.
Suno kay Balmaceda, sa 39 ka mga ginpakasaan sang kaso, 11 diri ang Punong Barangay samtang ang iban naman amo ang barangay kagawad, appointed officials kag Municipal Social Welfare and Development Officer.
Ginpahayag ni Balmaceda nga sa syudad kag probinsya sang Iloilo, may tag isa ka Punong Barangay nga naulamid sa criminal kag administrative cases kaupod ang iban nga barangay kag appointed officials.
Kalabanan sa mga tagreklamo ang nagpahayag nga ginbuhinan ang ila nabaton nga P6,000 kag nagaguwa sa imbestigasyon nga ang iban nga barangay officials ang wala sang nagakaigo nga rason sa pagbuhin sa cash assistance.
Ang iban naman nga mga barangay officials ang nagpaathag nga ila ginbuhinan ang cash assistance agud nga makabaton man sang ayuda ang iban nga wala nalakip sa listahan.
