ILOILO CITY – Magapadulong sa syudad sang Iloilo sa masunod nga semana sanday National Task Force Against COVID-19 chief implementer Secretary Carlito Galvez Jr.
Ini ang ginkumpirma sa Bombo Radyo ni Iloilo City Mayor Jerry Treñas kasunod sang ginpatigayon sang teleconference kaupod si Galvez, Department of the Interior and Local Government Sec. Eduardo Año, mga gobernador sa Western Visayas kag pila ka government officials.
Suno kay Treñas, sa Martes, Hunyo 2, maga-abot sa syudad sang Iloilo si Galvez kaupod ang iya team agud nga makigsapol sang personal sa mga gobernador sa rehiyon apang wala pa sang pinal nga oras kag lugar kun sa diin ini patigayunon.
Ginpahayag ni Treñas nga iya liwat nga iplastar sa tiglikom ang tuhoy sa One Panay kag kun ano na ang nahisugtan sa una nga pagsinapol kaupod ang mga gobernador.
Kadungan sa pagsinapol, ginpahayag sang alkalde nga iya man nga iplastar ang mga ginapatuman nga protocol sa bug-os nga rehiyon ilabi na ang may kaangtanan sa pagbukas sang klase kag pagpadayon sang byahe sang sakayang pandagat.
