ILOILO CITY – Temporaryo anay nga maga-untat sa pagpatigayon sang COVID-19 test ang Western Visayas Medical Center sa syudad sang Iloilo.
Sa pagpaathag sa Bombo Radyo ni Dr. Renilyn Reyes, COVID-19 spokesperson sang Department of Health 6, mechanical problem ang rason kun nga-a suspendido anay ang operasyon sang nasambit nga hospital kun COVID-19 ang pagahambalan.
Suno kay Reyes, naguba ang Negative Pressure Room kun sa diin gina-deactivate ang virus nga posible yara sa specimen santo sa biosafety requirement sang Department of Health.
Humalin sang Mayo 27, ginpahayag ni Reyes nga naglab-ot sa 1,168 ang pending nga specimen sa nasambit nga COVID-19 hospital.
Nagalaum ang natungdan nga masolusyunan gilayon ang nasambit nga problema agud nga maamat-amat na ang pagproseso sang specimen gikan sa bug-os nga rehiyon.
