ILOILO CITY – Tunga ang reaksyon sang mga pamatan-on tuhoy sa ginaduso nga online classes subong nga school year.
Sa Good Morning Philippines Program, ginpahayag ni Niche Clarrise Jover, student leader sang La Paz National High School, nga ang pagpatigayon sang online classes ang may bentaha kag disbentaha.
Suno kay Jover, ang online classes ang pabor para sa mga may yara sang gadget kag internet access apang disbentaha naman para sa mga pigado.
Ginpahayag ni Jover nga kadungan sang pagbukas sang klase sa Agosto 24, nakadepende naman sa mga ginikanan kun bala pa-eskwelahon ang ila kabataan ukon indi apang wala naman naga-untat ang gobyerno sa pagpangita sang paagi agud nga mapadayon ang paghatag sang edukasyon.
Bilang student leader, ginpahayag sang natungdan nga siya mismo ang makapamatuod nga daku ang mabulig sang social media sa pagpatigayon sang aktibidad ilabi na subong nga quarantine bangud nakadepende ini sa disiplina sa kaugalingon kag kun paano gamiton ang available resources.
Para naman kay Jose Danilo Borce II nga isa man ka student leader sang La Paz National High School, kinahanglan nga inkonsiderar sang Department of Education ang tanan nga disbentaha antes magpaguwa sang pinal nga desisyon.
Suno kay Borce, tion na agud bag-uhon ang paminatasan tuhoy sa paggamit sang social media kag internet nga sa kinaandan, ginagamit lamang para sa kalingawan.
Sa pihak sang pagpang-alang alang sa subong, ginpahayag ni Borce nga dapat nga hulaton kag buylugan na lang kun ano man ang mangin desisyon sang gobyerno.
