ILOILO CITY – Posible nga ipauntat ni Iloilo City Mayor Jerry Treñas ang pagbaton sang Locally Stranded Individuals sa tion nga indi masunod ang protocol.
Ini ang kasunod sang impormasyon nga nabaton sang alkalde nga ang iban sa mga Locally Stranded Individuals ang nakapauli sa Iloilo apisar nga wala nagasunod sa pagsulundan.
Sa interview sang Bombo Radyo kay Treñas, iya ginpahayag nga may iban nga nagapamilit nga makapauli gilayon apisar nga wala pa nakapaidalom sa COVID-19 test kag indi pa kumpleto ang dukomento.
Suno kay Treñas, may yara sang daku nga katungdanan ang Local Government Unit sa pagdesisyon kun bala batunon ukon indi ang returning residents.
May kaangtanan naman sa pag-abot sa syudad sang Iloio ni National Task Force Against COVID-19 chief implementer Sec. Carlito Galvez Jr., ginpahayag sang alkalde nga nahitso na ang itinerary sang tiglikom.
May yara sang patigayunon nga programa sa Cara Real de Iloilo subong nga aga para sa turn-over ceremony sang Personal Protective Equipment kag test kits lakip na diri ang pagpakigsapol sa Regional Inter-Agency Task Force.
Lakip man sa itinerary amo ang pagbisita ni Galvez sa mga COVID-19 Facilities kag ang pagpadulong sa distrito sang Molo kun sa diin ginaduso nga ipahamtang ang COVID-19 laboratory kag dormitory.
