ILOILO – Naga-ayo ang mga alkalde sa probinsya sang Iloilo nga pahanugutan na lang ang pagsakay sang tatlo ka pasahero sa isa ka tricycle kag ang angkas sa motorsiklo ilabi na kun maghimata man lang ang magasakay.
Sa interview sang Bombo Radyo kay Guimbal Mayor Oscar Garin, iya ginpahayag nga kun tani, amyendaran ang ginpaguwa nga memorandum sang Land Trsnportation Office tuhoy sa pagsakay sa tricycle kag motorsiklo.
Suno kay Garin, indi man mabasol ang mga driver nga magpanukot sang tuman ka mahal bangud nga nagapaniguro man sila nga indi mamiyerdihan.
Ginpahayag ni Garin nga mabug-at para sa isa lang ka pasahero nga bayaran ang pag-akupar sang isa ka tricycle kag kun tani, hatagan sang konsiderasyon sang Land Transportation Office ang nasambit nga hingyo.
Madugay na nga ginahingyo sang mga alkalde sa probinsya sang Iloilo ang tuhoy sa pagpahanugot sa pag-angkas sa motorsiklo kag ang pagdugang sang pasahero nga makasakay sa tricycle.
Sa interview sang Bombo Radyo kay Gov. Arthur Defensor Jr., iya ginpahayag nga sa iya Executive Order, ginapahanugutan ang angkas sa motorsiklo kun maghimata man lang ang sakay kag kun nagasuksok sang face mask kag helmet.
Magluwas diri, ginapahanugutan man nga tatlo ang pasahero sa tricycle, isa sa front seat, isa sa back seat kag isa sa back ride kun may yara man lang sang separator sa sulod.
Dapat man nga i-disinfect ang sulod sang tricycle agud nga masiguro nga matinlo ini kag hilway sa virus ang magasakay nga pasahero.
Magluwas diri, ginpahayag man sang Gobernador nga iya man nga hingyuon sa National Inter-Agency Task Force nga mas istriktuhan ang requirements kag ang proseso sa pagpapauli sa Locally Stranded Individuals kag Overseas Filipino Workers ilabi na ang mga naghalin sa high risk areas.
