ILOILO – Nagtuga naman sang pagsalangisag sa mga alkalde sa probinsya sang Iloilo ang pagsulundan tuhoy sa pagpasakay sang pasahero sa tricycle.
Sa ginpatigayon nga pagsinapol, ginpamangkot ni Miagao Mayor Macario Napulan kay Iloilo Gov. Arthur Defensor Jr. kun ano nga mandu ang pagabasehan.
Suno kay Napulan, nakasaad sa memorandum sang Land Transportation Office nga isa lang ka pasahero ang pahanugutan nga makasakay sa tricycle apang sa Executive Order naman sang gobernador, mahimo nga pahanugutan ang 3 ka pasahero kun may yara sang separator sa sulod.
Ang nasambit naman nga reklamo ang ginsuportahan naman ni League of the Municipalities of the Philippines Iloilo chapter Pres. Trixie Fernandez sang San Enrique.
Ini bangud nga suno kay Fernandez, ang tricycle kag motorsiklo lamang ang mayor nga transportasyon sa probinsya sang Iloilo ilabi na sa mga malayo nga barangay.
Sa pagpaathag naman sang Gobernador, mas mataas ang mandu sang Land Transportation Office kun ipaanggid sa iya ginpaguwa nga Executive Order.
Agud nga matigayon ang nasambit nga hingyo, ginpanugyan sang Gobernador nga magdihon sang resolusyon ang mga alkalde kag ipadala sa Land Transportation Office ukon sa National Inter-Agency Task Force.
