ILOILO CITY – Nagtaas ang presyo sang bugas subong apisar sa ginapangatubang nga Coronavirus Disease 2019 (COVID-19) pandemic.
Sa interview sang Bombo Radyo kay Boy Jocon, manugbaligya sang bugas sa Iloilo Central Market, iya ginpahayag nga kun sadto P38 tubtob P40 ang kilo sang bugas apang subong P42 pataas na ang kilo samtang kun sadto P1,680 ang sako sang bugas apang subong P1,950 tubtob P2,000 na.
Suno kay Jocon, umpisa sang COVID-19 pandemic, nagtaas na ang presyo sang bugas bangud man sa madamo nga demand.
Dugang pa niya, may yara man sang tag P1,800 nga sako sang bugas apang indi ini manami ang kalidad kag may mga bahay-bahay.
Samtang pahayag naman ni Gloria Ladao, NFA Licensed Grains retailer, wala sang supply ang National Food Authrity sang bugas bangud mahimo nga na-ubos ini bakal sang local government unit sa pagpanagtag sa mga pumuluyo sa tagsa ka lugar.
Suno kay Ladao, lunsay local rice lang ang ginabaligya niya bangud wala man sang imported rice.
