NORTH CAROLINA, USA – May yara na sang curfew nga ginpatuman sa North Carolina bangud sa nagapadayon nga hublag protesta may kaangtanan sa kamatayon sang Africa-American nga si George Floyd.
Suno kay Bombo International Correspondent Fr. Archie Tacay, kalabanan sa dalagku nga syudad sa North Carolina ang may yara sang nagakatabo nga hublag protesta.
Ginpahayag ni Tacay nga magluwas sa problema sa pandemya, nagdugang sa kahangawa sang mga residente ang halit nga mahimo ituga sang hublag protesta kun sa diin ang iban ang nagasakay lamang sa isyu agud nga makapatigayon sang looting ukon pagpangawat sa mga commercial establishments.
Ang kinalain lang suno kay Tacay amo nga sa North Carolina ilabi na sa banwa sang Wendell sa Wake County, peaceful protest ang ginapatigayon.
Sa pagkamatuod suno kay Tacay, ginapahanugutan sang mga opisyal sang North Carolina ang pagpatigayon sang hublag protesta apang siguraduhon lang nga indi mangin bayolente kasubong sa nagakatabo sa New York kag iban pa nga bahin sang Estados Unidos.
Sa subong, gindugangan ang National Guards nga nagabantay sa North Carolina santo sa mandu ni US President Donald Trump.
Ang National Guards suno sa natungdan amo ang reserve ukon part time active force nga yara sa idalom sang US Government.
