ILOILO CITY – Ginatahod ni Iloilo Vice Mayor Jeffrey Ganzon ang nangin akto sang traffic aid nga nagdakop sa tanod commander nga nagamaneho sang barangay tricycle patrol bangud sa paglabay sa national road.
Sa interview sang Bombo Radyo kay Vice Mayor Ganzon, iya ginpahayag nga indi man mabasol ang traffic aid bangud gin-obra lang niya ang iya obligasyon bangud ginadumili-an ang paglabay sang tricycle sa national road.
Apang base sa panaysayon ni Councilor Jojo Javellana, emerhensya ang paglabay sang tricycle patrol sang Brgy. Nabitasan, LaPaz bangud dalal-on sa animal bite center ang isa ka tuig nga bata nga ginkagat sang tutoy.
Samtang suno naman sa traffic aid nga nagdakop, wala siya sang may nakita nga bata sa sulod sang tricycle kundi may babaye lang nga amo ang nagasakay kag ang tanod commander .
Pahayag ni Ganzon, kun “between life and death” ukon emerhensya, ginahatagan ini sang konsiderasyon.
Dugang pa sang natungdan, kuntani wala na ini nag dako ang isyu kun gin-istorya ini sang duha ka grupo sang matawhay.
Sa Byernes, Hunyo 5, magasapol ang duha ka grupo agud nga ma istoryahan kag ma hitso ang problema.
