ILOILO CITY – Gina-sunod sang Iloilo City District Engineer’s Office ang guidelines sang Inter-Agency Task Force nga ipa-idalom sa medical examination ang kada empleyado sang contractors nga i-deploy sa mga project sites sa syudad sang Iloilo.
Sa interview sang Bombo Radyo kay Engr. Rodney Gustilo, pinuno sang Iloilo City District Engineer’s Office, iya ginpahayag nga 157 ka mga construction workers ang natigayon na nga ma pa idalom sa Coronavirus Disease 2019 (Covid-19) rapid testing.
Ginakalipay man niya bangud negatibo ang resulta sang tanan nga construction workers.
Pahayag niya, mismo ang mga contractor man ang nagabayad sa pag pa-rapid test sang ila mga tinawo.
Dugang pa sang natungdan, may yara pa sang dugang nga batch sang mga construction workers nga ipa-idalom sa rapid testing agud masiguro nga hilway ang mga ini sa Covid-19.
