ILOILO CITY- Naghatag sang reaksyon ang isa ka punong barangay kun ngaa isa siya sa mga nagperma sang condemnation letter batok kay Public Safety and Transportation Management head Jeck Conlu.
Ini ang may kaangtanan sa pagkadakop sang isa ka auxillary sa isa ka barangay patrol nga kuntani magadala sang bata nga ginkagat sang ido sa animal bite center
Sa interview sang Bombo Radyo kay Punong Barangay Marie Michelle Paloma, punong barangay sang Bantud La Paz, iya ginpahayag nga kuntani ginkonsidera ni Conlu ang indi normal nga sitwasyon sa subong sa diin, ang barangay patrol ang ginagamit sa mga pumuluyo sa tion sang emerhensya.
Suno kay Paloma, kuntani gin-implementar nila ang pagpanakop kun normal ang sitwasyon sa palibot.
Pahayag pa niya ang city hall ang nagakadapat basulon sa kun ngaa asta subong wala sa gihapon sang plaka ang mga barangay patrols
Kuntani suno sa natungdan, gin-intindi lang nga emerhensya kag kinahanglanon nga dal-on sa animal bite center ang pasyente nga isa ka tuig nga bata agud mahatagan sang nagakaigo nga pagbulong.
Samtang ginpahayag naman ni Punong Barangay Barbie Arosa nga wala siya nakaperma bangud nagapaligo siya sang nag-abot ang magapaperma sang condemnation letter.
Suno kay Arosa, kun papermahun siya, basahon man niya sa gihapon ang sulat antes niya ini permahan.
Pahayag pa niya, ginpaliwat ang amo nga sulat bangud wala nagpadulong sa iya ang nanay sang bata.
Dugang pa ni niya, ara mismo sa barangay patrol ang bata nga ginkagat sang ido kag upod sini ang iya nanay.
Pahayag pa sang natungdan, bangud wala sang bulong sa regional hospital rason nga plano nalang sang ginikanan nga magpadulong sa animal bite center.
Nahibaluan nga antes paman gindakop ang barangay patrol, una na ginhambalan sang duha ka auxilarry ang Chief tanod nga nagserbe nga driver nga indi pwede ang tricyle sa diversion road, apang ginpaathag man sang mga natungdan ang sitwasyon rason nga ginsugtan sang duha ka auxillary ang barangay patrol nga makalakat, apang gamitun lang ang service road.
