ILOILO CITY – Mahimo maapektuhan ang pagsalig sang mga pumuluyo sa Philippine National Police bangud sa pagtumod sang National Bureau of Investigation sa duha ka mga pulis nga suspek sa twin shooting incident sa syudad sang Iloilo.
Matandaan nga napatay sang Enero 19, 2020 sanday Allain Muller sa Cuartero, Jaro, Iloilo City kag makaligad ang pila ka minutos, ginluthang patay man si Delfin Britanico sa Nabitasan, La Paz.
Sa interview sang Bombo Radyo kay Atty. Jonnie Dabuco, Senior Legal Officer sang Commission on Human Rights, iya ginpahayag nga indi lang pagsalig sang pumuluyo kundi mangin ang kredibilidad sang mga pulis ang mahimo gina duha-duhaan.
Suno kay Dabuco, ila ginakalipay nga may yara sang dako nga development sa kaso nanday Muller kag Britanico kag ila ini ginapasalamatan sa bulig mismo sang National Bureau of Investigation.
Nagalaom man ang Commission on Human Rights nga mahatagan sang igtalupangod ang iban nga mga unsolved cases sa diin imbolbado amo ang mga riding-in-tandem suspects.
Nahibaluan nga gintumod sang National Bureu of Investigation nga ang duha ka mga pulis nga suspek sa nasambit nga krimen amo sanday PCpl. Jerry Carmelotes Villanueva nga yara na sa kustodiya sang kapulisan kag PCpl. Joseph Andrew Poneles Joven nga nangin dula-an.
