ILOILO CITY – Nagkalain-lain nga sentimyento ang ginpabutyag sang mga Punong Barangay sa distrito sang LaPaz sa syudad sang Iloilo sa ginpatigayon nga consultative meeting angot sa letter of condemnation batuk sa Public Safety and Transportation Management Office.

Ini ang may kaangtanan sa pagdakop sang traffic aid sa tanod commander sang Nabitasan, LaPaz nga nagamaneho sang barangay tricycle patrol upod ang iya asawa kag isa ka tuig nga anak nga ginkagat sang tutoy.

Sa pagsinapol, ginkwestyon ni Punong Barangay Marilyn Payunan sang Tabuc Suba, LaPaz, kun ngaa naglab-ot sa punto nga luyag sang iya mga kaupdanan nga punong barangay nga kakason sa posisyon si PSTMO head Jeck Conlu kag ang traffic aid nga nagdakop.

Suno kay Payunan, may yara sang due process nga nagakaigo sa pagdisiplina sa amo nga traffic aid.

Dugang pa niya, wala niya naluyagan ang mga tinaga nga nasaad sa letter of condemnation rason nga wala siya nagpirma.

Gin-athag naman ni Punong Barangay Johnny Lego sang Lopez Jaena Sur nga ang katuyuan sang letter of condemnation amo nga mapabati ang ila nga tingog.

Suno kay Lego, luyag lang nila ipabutyag ang ila hibubun-ot kag mahatagan man sang kaathagan ang ila mga palamangkutanon tuhoy sa natabo.

Samtang ginapanindugan naman ni Punong Barangay Oscar Guarin sang Aguinaldo, LaPaz nga pahalinon sa serbisyo ang traffic aid nga nagdakop sa tanod commander apisar emerhensya ang rason sang iya paglabay gamit ang brgy tricycle patrol.

Pahayag ni Guarin, indi bastante nga halinon lang ang traffic aid sa iban nga departamento bangud magapabilin ini sa gihapon nga arogante.

Gin-kwestyon man sang punong barangay ang pahayag ni Conlu nga wala ginakonsidera ang emerhensya sa pagdakop sang violator.

Depensa naman ni Conlu, mahimo nga nag impon lang ang iya mga pahayag sa isa ka interview sa media apang sa pagkamatuod, ang traffic enforcers pa ang nagabulig sa tion nga may yara sang emerhensya sa dalan.

Kag sang yara ang syudad sa General Community Quarantine, tanan nga mga tricycle ang may yara sang nakapaskil nga “medical service” kag agud nga makasiguro, ila ini ginapa untat kag gina tsekyar.

Kinahanglan ini nila nga himuon pahayag niya bangud kun tanan na lang ang paayunan, indi na nila mapatuman ang pagsulundan sa dalan.

Apang sa bahin naman ni Councilor Eduardo Peñarendondo, wala sang dapat nga basulon sa natabo kundi amo ang Iloilo City Government.

Ini bangud nga gindakop sang traffic aid ang tanod commander bangud wala sang plaka ang iya ginamaneho nga tricycle patrol.

Suno kay Peñaredondo, obligasyon sang city government nga mahatagan sang plaka ukon ma rehistro ang tanan nga mga tricyle patrol bangud ginhatag pa ini ni anay Iloilo City Mayor Jed Patrick Mabilog.

Makapila naman ka bes nga si Liga ng mga Barangay President Irene Ong ang nagapakig-angot sa General Services Office kag sa Public Safety and Transportation Management Office agud nga makakuha sang mga dokumento nga kinahanglanon sa pagparehistro sang mga tricycle patrol.

Apang naga ugtas lang siya pahayag niya nga tubtob subong wala sa gihapon ang papeles nga iya ginapangayo.