ILOILO – Common sense ang gamiton sa paghimo sang divider sa motorsiklo kag sa tricycle agud nga mapatuman ang physical distancing.
Ini ang pahayag ni Iloilo Gov. Arthur Defensor Jr. tuhoy sa iya appeal letter sa Land Transportation Office 6 may kaangtanan sa hingyo nga pahanugutan ang angkas sa motorsiklo kag ang pagdugang sang sakay sa tricycle.
Sa interview sang Bombo Radyo kay Defensor, iya ginpahayag nga nakasaad sa appeal letter nga butangan sang divider sa tunga sang driver kag sang angkas, butangan sang bar agud uyatan sang angkas kag kinahanglan nga magsuksok sang helmet, face mask kag gloves ang naga-angkas lakip na ang driver.
Sa bahin naman sang tricycle, ginahingyo sang Gobernador nga pahanugutan ang pagsakay sang tatlo ka mga pasahero kun sa diin ang isa ang magapungko sa front seat sang side car, isa sa likod sang side car kag isa naman ang backrider.
Nagakadapat nga butangan sang divider sa tunga sang mga pasahero kag sang driver agud nga wala sang physical contact.
May kaangtanan naman sa paghimo sang divider, ginpahayag sang natungdan nga nakadepende ini sa istilo kag sa materyales nga luyag gamiton sang driver.
