ILOILO CITY – Wala lang nakahingagaw sa pagpirma sa letter of condemnation batok kay Public Safety and Transportation Management Office Head Jeck Conlu si Punong Barangay Barbie Aroza sang Nabitasan, La Paz, Iloilo City.
Ini ang sabat ni Aroza kun nga-a wala nakita ang iya pirma sa letter of condemnation batok sa PSTMO head kasunod sang pagdakop sa tanod commander sang Brgy. Nabitasan nga nagmaneho sang wala sang plaka nga Barangay Tricycle Patrol nga may karga nga pasyente.
Sa interview sang Bombo Radyo kay Aroza, iya ginpahayag nga sang nagligad nga Dominggo, gindul-ong sa iya ang draft letter nga gindihon sang iya mga kaupod nga Punong Barangay.
Sang iya ginbasa ang draft letter, ginpahayag ni Aroza wala niya mauyunan ang pila ka probisyon rason nga iya ginhingyo nga amyendaran ang kaundan sang sulat ilabi na ang mga tinaga nga ‘strongly recommend the removal of Mr. Jeck Conlu’.
Sa pagpaathag ni Aroza, indi man kinahanglan nga maglab-ot sa punto nga pahalinon sa posisyon si Conlu bangud nga mahitso man lang ang problema sa mas matawhay nga paagi.
Sang adlaw nga ginbalik sa iya ang sulat, ginpahayag ni Aroza nga natabu-an nga masako siya sa ila balay kag sang amo nga tion, nahingagaw sa paghatag kay Iloilo City Councilor Jojo Javellana nga chairman sang Committee on Police Matters, ang letter of condemnation.
Gin-athag sang Punong Barangay nga kun siya lang ang pamangkuton, handa siya nga magpirma sa nasambit nga sulat.
Daku man ang nabulig sang consultative meeting suno sa natungdan bangud nga ang tagsa ka bahin ang nakapaathag agud nga mahatagan na sang nagakaigo nga solusyon ang nasambit nga prblema.
