DUMANGAS, ILOILO – Ginkwestyon sang concerned citizen ang ginapahayag wala nagakaigo nga pagdakop sa iya hinablos nga naga jogging samtang wala ang suksok nga face mask sa Dumangas, Iloilo.
Sa interview sang Bombo Radyo sa concerned citizen nga nagpahinago lang sang pangalan, iya ginpahayag nga wala niya ginakwestyon ang ordinansa tuhoy sa mandatory nga pagsuksok sang face mask kundi ang indi husto nga paghatag sang silot sa violator.
Suno sa concerned citizen, indi man mabasol ang violators bangud kun kaisa, indi tanan ang may ihibalo tuhoy sa provincial ordinance.
Ginpahayag sang concerned citizen nga first time nga nadakpan ang iya hinablos kag kun basehan ang provincial ordinance, reprimand ukon warning lang anay ang igahatag sa violator.
Ugaling suno sa tagreklamo, ginapabayad sang pulis sang isa ka libo nga multa ang iya hinablos kag kun wala sang inugbayad, presuhan ang dangtan sang violator.
Kun tani suno sa natungdan, ipahangop sa tanan kun ano ang kaundan sang provincial ordinance agud nga indi na masulit pa ang natabo sa iya hinablos.
Ginkumpirma naman ni Mayor Ronaldo ‘Onal’ Golez nga nakalab-ot na sa iya ang nasambit nga reklamo.
Suno kay Golez, iya na nga nahitso ang nasambit nga problema kag nagahingyo sa publiko nga sundon ang ginapatuman nga ordinansa.
Ginkumpirma naman sang alkalde nga sa 1st offense, warning lamang ang igahatag sa violator kag multa naman kun sunod-sunod na ang violation.
Sa pagpaathag naman sang fitness instructor nga si Georey Bucana, indi advisable ang pagsuksok sang face mask samtang naga ehersisyo.
Ini bangud nga suno kay Bucana, indi masunod ang proper nga pag inhale kag pag exhale nga ginakinahanglan sa exercise.
