ILOILO CITY – Wala nakaluwas ang Anti-Terrorism Bill sa nangin sermon ni Msgr. Meliton Oso, Director sang Jaro Archdiocesan Social Action Center, kadungan sang misa nga ginpatigayon sa Jaro Metropolitan Cathedral.
Suno kay Msgr. Oso, ang Anti-Terrorism Bill ang may yara sang bentaha kag disbentaha.
Ang nasambit nga hagna nga sa ulihi mangin layi ang bentaha para sa gobyerno apang disbentaha naman ini para sa mga ordinaryo nga tawo nga mahimo masal-an nga terorista paagi sa pagpahayag sang pagkadismaya kag pagpakamalaot sa gobyerno.
Siya mismo suno kay Msgr. Oso ang nagahatag sang negatibo nga komento batok sa gobyerno kun may yara siya sang makita nga inhustisya apang wala ini nagakahulugan nga isa na siya ka terorista.
Ang pagpahayag sang pagkadismaya suno sa natungdan ang wala nagakahulugan sang pagkontra sa gobyerno bangud nga ini ang kinamatarong sang tanan ilabi na kun matuod ang alegasyon.
Sa tion nga mapasar na ang nasambit nga hagna, indi malayo suno kay Msgr. Oso nga may matabo nga warrantless arrest.
