LAMBUNAO, ILOILO – Indi magselebrar sang kapistahan ang banwa sang Lambunao sa probinsya sang Iloilo sa maabot nga Setyembre.
Sa interview sang Bombo Radyo kay Lambunao Mayor Reynor Gonzales, iya ginpahayag nga ipa-iway lang anay ang fiesta sa banwa agud malikawan ang Coronavirus Disease 2019 (COVID-19).
Suno kay Gonzales, mabudlay ang pagpatuman sang physical distancing sa tion nga pahanugutan ang kapistahan kag isa man sa ginakahangaw-an sang alkalde amo ang mga bisita nga magpadulong sa Lambunao bangud indi ini ma monitor kun sa diin ang mga ini halin nga lugar.
Samtang sa bahin naman sang pagselebrar ang birthday ukon kaadlawan, mahimo man nga maghanda sang pagkaon apang nagakadapat pamilya lang ang bisita kag indi na manghagad sang ka kilala sa iban nga banwa.
Nakapakig-angot naman si Mayor Gonzales sa tagsa ka mga punong barangay kag nag hingyo nga i-monitor ang mga tawo nga nagasulod sa ila mga kabarangayan.
