OSLO, NORWAY – Nagakabalaka ang gobyerno sang Norway nga mahimo magtaas ang kaso sang Coronavirus Disease 2019 (COVID-19) bangud madamo nga tawo ang nagpatigayon sang hublag protesta sa diin wala na sunod ang physical distancing.
Sa report ni Bombo International Correspondent Quennie Vasquez direkta sa Oslo, Norway, iya ginpahayag nga ginabanta 12,000 ka mga tawo ang nag-upod sa ‘Black Lives Matter’ protest sa atubang sang Norwegian parliament building.
Ini ang angot sa isyu sa racism kasunod sang pagkapatay sang black-american nga si George Floyd sa kamot sang isa ka pulis.
Sang ginpatigayon ang protesta, wala sang mga pulis nga makit-an sa dalan nga nagakontrol sa mga raliyista bangud sa nasambit nga pungsod, may yara sang kinamatarong ang mga tawo nga ipabutyag ang ila nga kawsa.
Dugang pa sang natungdan, magluwas nga wala sang physical distancing ang pagpatigayon sang hublag protesta, indi man obligado ang tawo nga magsuksok sang facemask.
Sa bahin naman sang klase, bukas na ang mga buluthuan sa kindergarten kag elementarya sa diin ginapatuman ang face-to-face learning.
Sa subong, may yara na sang 8,542 ka kaso sang COVID-19 sa Norway, 8,138 ang naka recover kag 238 ang napatay.
