ILOILO CITY – Ginatugyan na lang sa Diyos sang pamilya Occillo ang pagsolbar sang kaso kag pagtumod kun sin-o ang suspek sa summary execution nga natabo sang Abril 18, 2012.
Ang biktima amo si Mishrhym Occillo sa diin natukiban ang iya bangkay sa Brgy. Sooc, Arevalo, Iloilo City nga may yara sang plastic bag nga nakatabon sa iya ulo, may nakahigot nga tela sa iya bibig kag nakabaklid ang iya mga kamot samtang nahigtan sang packaging tape.
Una na nga ginkumpirma sang Iloilo City Police Office nga konektado ang natabo kay Occilo sa Muller-Britanico case nga natabo sang Enero 19, 2020 bangud gintumod sang Regional Crime Laboratory Region 6 nga nag santu ang armas nga gingamit sa pagpatay kay Alain Muller sa Brgy. Cuartero sa distrito sang Jaro, Delfin Britanico sa Brgy. Nabitasan sa distrito sang La Paz kag sa natabo kay Mishrhym Occillo.
Sa interview sang Bombo Radyo kay Roberto Occillo, amay sang biktima, iya ginpahayag nga indi na siya interesado pa nga makig-angot sa imbestigasyon sa kaso sang iya bata.
Suno sa amay, naga sakit man ang iya balatyagon nga bilang ginikanan, ginpatay ang iya anak apang wala na siya sang may mahimo pa bangud walo na ka tuig ang nagligad.
Kun ginpati lang sang iya anak ang tanan nga iya ginhambal pahayag niya, wala kuntani ini napatay.
Nakahibalo man si Roberto Occillo sa mga ginakaulamiran sang iya anak kaangay sang pagpangawat kag makapila na ini ka beses nga nagpangabay sa iya anak nga untatan ang ginahimo kag mag-focus sa iya nga trabaho.
Sa mga yara sa likod sang pagkapatay ni Mishrhym pahayag sang amay, matuhaw gid ang kamatuoran.
