ILOILO CITY – Nagdamo naman ang obstruction sa higad sang dalan umpisa sang ginbalik ang clearing operations sa syudad sang Iloilo.
Sa interview sang Bombo Radyo kay Love Joy Hosenilla, pinuno sang Task Force on Anti-Squatting and Illegal Structures Unit, iya ginpahayag nga sang nagligad pa nga semana nag-umpisa ang task force sa pagpatigayon sang clearing operations.
Suno kay Hosenilla, ang iban sa obstruction amo ang mga salakyan nga gina park sa higad sang dalan, nagalabaw nga kiosko kag ginpangtumpok nga oling.
Lakip sa una nga ginpadulungan sang task force amo ang mga barangay sa palibot sang Iloilo Terminal Market kag pila ka barangay sa distrito sang La Paz.
Ang pagbalik sang clearing operation suno sa natungdan ang kabahin sang mandu sang Department of the Interior and Local Government kag mismo ni Iloilo City Mayor Jerry Treñas.
