ILOILO CITY – 90 sa 180 ka barangay sa syudad sang Iloilo ang nagapanag-iya sang legal nga barangay tricycle patrol.
Sa interview sang Bombo Radyo kay Joren Sartorio, pinuno sang General Service Office, iya ginpahayag nga kinahanglan nga magpakig-angot ang mga barangay official sa iya talatapan para sa kinahanglanon sa pagparehistro sang tricycle patrol.
Suno kay Sartorio, ang General Services Office amo ang naga-uyat sang mga dukomento sa pagproseso sang deed of transfer kag agud nga makakuha sang plaka sa Land Transportation Office.
Ginpahayag naman ni Sartorio nga 56 ka barangay ang wala gid nakapasa sang bisan isa nga dukomento sa General Services Office samtang 34 naman ang nagpasa sang kulang nga requirements.
Kun tani suno kay Sartorio, ang barangay officials na ang may katungdanan sa pagproseso sang registration lakip na ang pagpa-renew sini.
Sa tion nga matigayon ang deed of transfer, ang barangay council na ang nagapanag-iya sang tricycle patrol kag wala na diri sang katungdanan ang Iloilo City Government.
Sa pagpaathag naman ni Liga ng mga Barangay President Irene Ong, sang termino pa ni anay Iloilo City Mayor Jed Patrick Mabilog ginpanghatag ang mga tricycle patrol.
Suno kay Ong, sang ginhatag ang tricycle patrol, wala man ginpahibalo ang mga punong barangay tuhoy sa deed of transfer rason nga wala man ini na follow-up.
Sa pagkamatuod suno kay Ong, siya pa ang boluntaryo nga nagpanotaryo sang dukomento sang nagpahibalo na ang General Services Office.
